Հրուշակագործ քույրեր Ռենա և Վերա Հովհաննիսյանները Նոյեմբերի վերջին պատրաստվում են մասնակցել Լյուքսեմբուրգում կայանալիք «Խոհարարների աշխարհի գավաթ» միջազգային մրցույթին:

Վերայի խոսքով` այժմ քրտնաջան աշխատում են, որպեսզի կարողանան հավուր պատշաճի ներկայանալ մրցույթին: «Հուլիսի 7-ին իմ ու քրոջս ծնունդն էր: Այդ օրն անակնկալ մատուցեցի նրան` մեկնելով իր մոտ`Մոսկվա: Այդ օրվանից էլ սկսեցինք նախապատրաստական աշխատանքները, բայց դեռևս գաղտնիք է, թե ինչ աշխատանք ենք ներկայացնելու»,- ասաց Վերան` դժվարանալով ասել, թե ինչ հույսեր ունի մրցույթից:

 «Մենք ոչ մի անգամ չենք մտածել, որ անպայման պետք է հաղթենք, ուղղակի մեր աշխատանքը մեծ սիրով ենք արել: Ինձ հաղթած եմ զգում այն ժամանակ, երբ իմ իղձերն ու ցանկությունները կարողանում եմ փոխանցել իմ կոմպոզիցիային:  Համենայն դեպս, կաշխատենք այնպես անել, որ հաղթանակած վերադառնանք»,- նշեց Վերան և ավելացրեց, որ ավելի շատ կարևորում է Ռենայի հաղթանակը:  «Ես 2003 թվականից մասնկացում եմ տարբեր մրցույթների և ունեմ մրցանակներ, իսկ քույրս դեռ երկու անգամ է մասնակցել մրցույթի, թեև  2 անգամ էլ ոսկե մեդալ է ստացել: Նախորդ մրցույթին ես իր համար ավելի շատ ուրախացա և հույս ունեմ, որ այս տարի ևս նա կուրախացնի մեզ»,- ասաց Վերան:

Նյութը՝ ESem.am-ից: